കേരളം
ബിടെക് പരീക്ഷയിലെ കൂട്ട കോപ്പിയടി: 28 മൊബൈല്‍ ഫോണുകള്‍ പിടിച്ചെടുത്തു
സാങ്കേതിക സര്‍വകലാശാല ബി ടെക് പരീക്ഷയില്‍ കോപ്പിയടിയുമായി ബന്ധപ്പെട്ട് 28 മൊബൈല്‍ ഫോണുകള്‍ വിദ്യാര്‍ഥികളില്‍ നിന്ന് പിടിച്ചെടുത്തു. നാല് കോളേജുകളില്‍ നിന്നാണ് ഈ മൊബൈല്‍ ഫോണുകള്‍ പിടിച്ചെടുത്തത്.
ഇന്‍വിജിലേറ്റര്‍മാരെ തെറ്റിദ്ധരിപ്പിക്കാന്‍ ഒരു മൊബൈല്‍ ഫോണ്‍ പുറത്തുവെച്ച് മറ്റൊരു ഫോണുമായാണ് വിദ്യാര്‍ഥികള്‍ പരീക്ഷാ ഹാളിലേക്ക് പ്രവേശിച്ചതെന്നും കണ്ടെത്തി.
ഒരു കോളേജില്‍ നിന്ന് മാത്രം 16 ഫോണുകളാണ് പിടിച്ചെടുത്തത്. മറ്റൊരു കോളേജില്‍ നിന്ന് 10 ഫോണുകളും. ഹൈടെക്ക് കോപ്പിയടിക്കായി ഒട്ടേറെ വാട്‌സാപ്പ് ഗ്രൂപ്പുകളാണ് പ്രവര്‍ത്തിച്ചിരുന്നത്.
മൊബൈല്‍ ഫോണുമായി പരീക്ഷാ ഹാളിലേക്ക് കയറിയ വിദ്യാര്‍ഥികള്‍ ചോദ്യപേപ്പറിന്റെ ഫോട്ടോയെടുത്ത് വാട്‌സാപ്പ് ഗ്രൂപ്പില്‍ ഇടുന്നതാണ് കോപ്പിയടിയുടെ ആദ്യഘട്ടം.
ചോദ്യപേപ്പര്‍ അപ് ലോഡ് ചെയ്താല്‍ ഇതിന്റെ ഉത്തരങ്ങളും ഗ്രൂപ്പിലെത്തും. ഏകദേശം 75 മാര്‍ക്കിന്റെ ഉത്തരങ്ങള്‍ ഈ വാട്‌സാപ്പ് ഗ്രൂപ്പുകളില്‍ വന്നതായും കണ്ടെത്തിയിട്ടുണ്ട്.
വെള്ളിയാഴ്ച നടന്ന ബി ടെക് മൂന്നാം സെമസ്റ്ററിലെ ലീനിയര്‍ ആള്‍ജിബ്ര ആന്‍ഡ് കോംപ്ലക്‌സ് അനാലിസിസ് സപ്ലിമെന്ററി പരീക്ഷയിലാണ് കോപ്പിയടി കണ്ടെത്തിയത്. ഇതേത്തുടര്‍ന്ന് പരീക്ഷ റദ്ദാക്കിയിരുന്നു.
കോപ്പിയടി നടന്നതായി തെളിഞ്ഞ നാല് കോളജുകള്‍ വടക്കന്‍ ജില്ലകളിലും ഒരെണ്ണം തിരുവനന്തപുരത്തുമാണ്. കോപ്പിയടി നടന്ന നാലു കോളജുകളും 5 ദിവസത്തിനകം റിപ്പോര്‍ട്ട് നല്‍കണമെന്ന് സാങ്കേതിക സര്‍വകലാശാല നിര്‍ദേശിച്ചു.
അതേസമയം, കോപ്പിയടി വിഷയത്തില്‍ പോലിസില്‍ പരാതി നല്‍കണമോ എന്ന കാര്യത്തില്‍ അടുത്ത സിന്‍ഡിക്കേറ്റ് യോഗത്തില്‍ തീരുമാനമെടുക്കും.
