പ്രാദേശിക മാധ്യമ പ്രവർത്തകരുടെ പ്രശ്നങ്ങൾ സർക്കാർ പരിഹരിക്കണം; ഹൈബി ഈഡൻ എം.പി.

പ്രാദേശിക മാധ്യമ പ്രവർത്തകർ സർക്കാരിൽ നിന്നും നേരിടുന്ന അവഗണന ദൗർഭാഗ്യകരമാണെന്ന് ഹൈബി ഈഡൻ എം.പി. കേരള പത്രപ്രവർത്തക അസോസിയേഷൻ്റെ സംസ്ഥാന പ്രതിനിധി സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ഗ്രാമങ്ങളിലും ചെറുപട്ടണങ്ങളിലും വികസന പ്രശ്നങ്ങൾ അധികാരികളുടെ മുന്നിലെത്തിക്കുന്നതിൽ നിർണായകമായ പങ്കാണ് പ്രാദേശിക മാധ്യമ പ്രവർത്തകർ നിർവ്വഹിക്കുന്നത്. അവർക്ക് ആനുകൂല്യങ്ങളും അംഗീകാരവും നൽകാൻ സർക്കാർ അടിയന്തര നടപടി സ്വീകരിക്കണമെന്നും എം.പി. ആവശ്യപ്പെട്ടു.

സ്റ്റേറ്റ് പ്രതിനിധികൾ ഉദ്ഘാടകൻ MP ഹൈബി ഈഡനോടൊപ്പം

കെ.കെ. ഇൻ്റർനാഷണൽ ഹോട്ടൽ ആഡിറ്റോറിയത്തിൽ നടന്ന സമ്മേളനത്തിൽ പ്രസിഡൻ്റ് ജി.ശങ്കർ അധ്യക്ഷത വഹിച്ചു.ജനറൽ സെക്രട്ടറി മധു കടുത്തുരുത്തി സംഘടനാ റിപ്പോർട്ടും സീനിയർ സെക്രട്ടറി കെ.കെ.അബ്ദുള്ള പ്രവർത്തന റിപ്പോർട്ടും ട്രഷറർ ബൈജു പെരുവ കണക്കും അവതരിപ്പിച്ചു.

വൈസ് പ്രസിഡണ്ടുമാരായ സലിംമൂഴിക്കൽ മുഖ്യപ്രഭാഷണവും ബേബി കെ.പീലിപ്പോസ് മാർഗരേഖ അവതരണവും നിർവഹിച്ചു. സിനിമാ താരം വിനു മോഹനെ ആദരിച്ചു.സെക്രട്ടറി കണ്ണൻ പന്താവൂർ സ്വാഗതവും എറണാകുളം ജില്ലാ പ്രസിഡൻറ് യു. കുഞ്ഞുമുഹമ്മദ് നന്ദിയും പറഞ്ഞു. സംസ്ഥാന സമ്മേളനം 2023 ഏപ്രിൽ 30, മെയ് 1 എറണാകുളത്ത് നടത്തുവാൻ തീരുമാനിച്ചു.

പ്രാദേശിക മാധ്യമ പ്രവർത്തകർക്ക് ക്ഷേമനിധി, ജില്ലാതല അക്രഡിറ്റേഷൻ, ആരോഗ്യ ഇൻഷുറൻസ് എന്നിവ ഏർപ്പെടുത്തണമെന്ന് സമ്മേളനം പാസാക്കിയ പ്രമേയത്തിൽ ആവശ്യപ്പെട്ടു. മാധ്യമ പ്രവർത്തകർക്ക് നേരെയുള്ള അക്രമങ്ങൾ വർധിച്ചു വരുന്നതിനെതിരെ കർശന നടപടികൾ സ്വീകരിക്കണമെന്നും മാധ്യമ പ്രവർത്തകർക്ക് നേരെയുള്ള അക്രമങ്ങളിൽ ജാമ്യമില്ലാ വകുപ്പ് ചുമത്തി കേസെടുക്കണമെന്നും യോഗം ആവശ്യപ്പെട്ടു.

മാധ്യമ പ്രവർത്തകൻ കെ.എം.ബഷീറിനെ കാറിടിച്ച് കൊന്ന ഐ.എ.എസ്.ഓഫീസർ ശ്രീറാം വെങ്കിടറാമിന് രക്ഷപ്പെടാൻ അവസരം ഒരുക്കിയ സർക്കാർ നിലപാടിൽ യോഗം പ്രതിഷേധിച്ചു.