കേരളം
കോഴിക്കോട് കാറും ലോറിയും കൂട്ടിയിടിച്ച് അഞ്ചു മരണം
കോഴിക്കോട് രാമനാട്ടുകരയിൽ വാഹനാപകടത്തിൽ അഞ്ച് പേർ മരിച്ചു. കാറും സിമന്റ് ലോറിയും കൂട്ടിയിടിച്ചാണ് അപകടം സംഭവിച്ചത്. പാലക്കാട് ചെര്പ്പുളശ്ശേരി സ്വദേശികളായ സാഹിര്, ഷാഹിര്, നാസര്, സുബൈര്, അസൈനാര് എന്നിവരാണ് മരിച്ചത്.
ഇന്ന് പുലര്ച്ചെ പുളിഞ്ചോട് വളവിന് സമീപമാണ് സംഭവം. കാര് പൂര്ണമായും തകര്ന്നു. ലോറി ഡ്രൈവര്ക്ക് ഗുരുതരമായ പരിക്കുകളില്ല. ഇയാളെ ആശുപത്രിയിലേക്ക് മാറ്റി. വാഹനങ്ങള് അമിത വേഗതയിലായിരുന്നു എന്നാണ് ദൃക്സാക്ഷികള് പറയുന്നത്. ഒരാളുടെ മൃതദേഹം കാറിന് പുറത്തായിരുന്നു. എല്ലാവരും സംഭവ സ്ഥലത്ത് വെച്ചുതന്നെ മരിച്ചു.
വലിയ ശബ്ദം കേട്ട് നാട്ടുകാര് ഉടന് തന്നെ രക്ഷാപ്രവര്ത്തനത്തിനെത്തുകയായിരുന്നു. കാറിടിച്ച് സമീപത്തെ ഇലക്ട്രിക് പോസ്റ്റ് മൂന്നായി പിളര്ന്നു. കെഎസ്ഇബി ഓഫീസില് വിളിച്ച് വൈദ്യുതി ബന്ധം വിച്ഛേദിച്ച ശേഷമാണ് രക്ഷാപ്രവര്ത്തനം തുടങ്ങിയത്. രാവിലെ 4.45ഓടു കൂടിയായിരുന്നു രാമനാട്ടുകരയ്ക്കു സമീപം പുളിഞ്ചോട് വെച്ച് ഇരുവാഹനങ്ങളും കൂട്ടിയിടിച്ചത്.
സുഹൃത്തിനെ വിമാനത്താവളത്തിൽ ആക്കാനായി പുറപ്പെട്ടതായിരുന്നു വാഹനം. മെഡിക്കൽ കോളജ് ആശുപത്രിയിലെത്തിച്ച മൃതദേഹങ്ങൾ മോർച്ചറിയിലേക്ക് മാറ്റി.