തൃശൂരിൽ ലഹരി മാഫിയ സംഘം എസ്ഐയെ ആക്രമിച്ചു: 3 പേർ അറസ്റ്റിൽ

മതിലകത്ത് ലഹരി മാഫിയ സംഘം എസ്ഐയെ ആക്രമിച്ചു. ജൂനിയർ എസ്ഐ മിഥുൻ മാത്യുവിനെയാണ് ആക്രമിച്ചത്. പരുക്കേറ്റ എസ്ഐയെ കൊടുങ്ങല്ലൂർ താലൂക്ക് ആശുപത്രിയിൽ പ്രവേശിപ്പിച്ചു. ഇന്നലെ രാത്രി പത്തരയോടെയാണു സംഭവം. ലഹരി മാഫിയ സംഘത്തെ കുറിച്ച് രഹസ്യ വിവരം ലഭിച്ചതിനെ തുടർന്ന് എസ്ഐയും സംഘവും അന്വേഷണത്തിനെത്തിയപ്പോഴായിരുന്നു ആക്രമണം.

ശ്രീനാരായണപുരം പതിയാശേരിയിൽ റോഡിൽ നിൽക്കുകയായിരുന്ന മൂവർ സംഘത്തെ ചോദ്യം ചെയ്യുന്നതിനിടെയാണ് സംഘം പൊലീസിനെ ആക്രമിച്ച് രക്ഷപ്പെടാൻ ശ്രമിച്ചത്. എസ്ഐയെ ആക്രമിക്കുന്നത് കണ്ട് മറ്റു പൊലീസുകാർ ചേർന്ന് അക്രമി സംഘത്തെ കീഴ്പ്പെടുത്തുകയായിരുന്നു.

ആക്രമണത്തിൽ എസ്ഐയുടെ മുഖത്ത് പരുക്കേറ്റു. പൊലീസ് വാഹനത്തിനും അക്രമികൾ കേടുപാടുകൾ വരുത്തിയിട്ടുണ്ട്. സംഭവത്തിൽ ഉൾപ്പെട്ട മൂന്ന് പേരെയും പൊലീസ് കസ്റ്റഡിയിലെടുത്തു. എടവിലങ്ങ് കുഞ്ഞയിനി സ്വദേശികളായ ഇളംതുരുത്തി വീട്ടിൽ സൂരജ് (18), കാരാഞ്ചേരി വീട്ടിൽ അജിത്ത് (23), കിഴക്കേപ്പാട്ട് വീട്ടിൽ അഖിൽ (21) എന്നിവരാണ് കസ്റ്റഡിയിലുള്ളത്. ഇവർക്കെതിരെ ജാമ്യമില്ലാ വകുപ്പ് പ്രകാരമാണ് കേസെടുത്തിട്ടുള്ളത്. ഇവരെ വൈകീട്ട് കോടതിയിൽ ഹാജരാക്കും.