ആരോഗ്യം
കുഞ്ഞുങ്ങളുടെ ചെവിയില്‍ ഉമ്മ വയ്ക്കരുത്, കാരണം….
കുഞ്ഞുങ്ങളെ താലോലിയ്ക്കാനും ഉമ്മ വയ്ക്കാനുമെല്ലാം എല്ലാവര്‍ക്കും താല്‍പര്യമാകും. കുഞ്ഞുങ്ങളുടെ നിഷ്‌കളങ്കതയും ഓമനത്തവുമെല്ലാം എല്ലാവരേയും ആകര്‍ഷിയ്ക്കുന്ന ഘടകങ്ങളുമാണ്. എന്നാല്‍ നാം അറിയാതെ ചെയ്തുപോകുന്ന ചില ലാളനകളുടെ വഴികള്‍ കുട്ടികള്‍ക്ക് തന്നെ അപകടമായി വരുന്നു. ഇത്തരത്തില്‍ ഒന്നാണ് കുട്ടികളെ ഉമ്മ വയ്ക്കുന്നത്.
കുട്ടികളെ ഉമ്മ വയ്ക്കുന്നതില്‍ എന്താണ് തെറ്റെന്ന് തോന്നാം. എന്നാല്‍ കുട്ടികളുടെ ചെവിയില്‍ ഉമ്മ വയ്ക്കുന്നത് നല്ലതല്ലെന്നാണ് പറഞ്ഞു വരുന്നത്. പലരും കുട്ടികളുടെ ചെവിയാണ് ഉമ്മ വയ്ക്കാനായി തെരഞ്ഞെടുക്കുന്ന ഒരിടം. എന്നാല്‍ ഇത് കുഞ്ഞുങ്ങളുടെ കേള്‍വി വരെ പോകാന്‍ ഇടയാക്കന്ന ഒന്നാണെന്നതാണ് വാസ്തവം. പ്രത്യേകിച്ചും ചെറിയ കുഞ്ഞുങ്ങളുടെ. എന്നാല്‍ ഇത് കുഞ്ഞുങ്ങളുടെ കേള്‍വി വരെ കളയുന്ന ഒന്നാണെന്ന് വേണം, പറയുവാന്‍.
കുഞ്ഞുങ്ങളുടെ ഇയര്‍ കനാല്‍ വളരെ ചെറുതാണ്. ഇതിനാല്‍ തന്നെ ഉമ്മ വയ്ക്കുമ്പോഴുണ്ടാകുന്ന ആ പ്രഷര്‍ കുഞ്ഞിന്റെ ചെവിയ്ക്ക് തകരാറുണ്ടാക്കുന്നു. പ്രത്യേകിച്ചും അമര്‍ത്തി ചുംബിയ്ക്കുമ്പോള്‍. ഇത് ആ പ്രായത്തില്‍ നമുക്ക് തിരിച്ചറിയാന്‍ സാധിച്ചുവെന്നും വരില്ല. പിന്നീട് കുഞ്ഞ് വളരുന്ന പ്രായത്തിലായിരിയ്ക്കും നാം ഇത് തിരിച്ചറിയുക. ചെവിയ്ക്കുള്ളിലെ ദ്രാവകം ഉമ്മ നല്‍കുന്ന മര്‍ദത്തില്‍ ചോര്‍ന്ന് കോക്ലിയര്‍ കോശങ്ങളെ ദോഷകരമായി ബാധിയ്ക്കുന്നതിലൂടെയാണ് കേള്‍വിത്തകരാറുണ്ടാകുന്നത്.
കുഞ്ഞുങ്ങളില്‍ മാത്രമല്ല, മുതിര്‍ന്നവരിലും ഇതേ അവസ്ഥയുണ്ടാകുന്നതിന് സാധ്യതയുണ്ട്. എന്നാല്‍ കുഞ്ഞുങ്ങളേക്കാള്‍ മുതിര്‍ന്നവര്‍ക്ക് ഇയര്‍ കനാലിന് കൂടുതല്‍ മര്‍ദം താങ്ങാന്‍ കഴിയുന്നതിനാല്‍ ഇത്തരം സംഭവങ്ങള്‍ അധികമുണ്ടാകാറില്ല. എങ്കിലും ഇതിനുള്ള സാധ്യത തളളിക്കളയാനുമാകില്ല. ഉമ്മ വയ്ക്കുന്നത് മാത്രമല്ല, നാം തമാശ രൂപത്തില്‍ ചെവിയില്‍ ഊതുക, ചെവിയോട് അടുപ്പിച്ച് വലിയ ശബ്ദം കേള്‍പ്പിയ്ക്കുക തുടങ്ങിയവയെല്ലാം കുഞ്ഞുങ്ങള്‍ക്ക് ദോഷം വരുത്താം. ഒരു പരിധി വരെ മുതിര്‍ന്നവര്‍ക്കും. ചെവിയ്ക്കുള്ളില്‍ മുഴക്കം പോലെ തോന്നുക, ഛര്‍ദിയ്ക്കാന്‍ വരിക, ശബ്ദം സഹിയ്ക്കാതെ വരിക, ചെവി അടഞ്ഞ പോലെ തോന്നുകയെന്നതാണ് സെന്‍സോറിന്യൂറല്‍ ഹിയറിംഗ് ലോസ് എന്ന ഈ അവസ്ഥയില്‍ ഉണ്ടാകുന്ന ലക്ഷണങ്ങള്‍. ഇത് കുഞ്ഞുങ്ങള്‍ക്ക് തിരിച്ചറിയാനോ പറയാനോ സാധിയ്ക്കില്ല. എന്നാല്‍ മുതിര്‍ന്നവര്‍ക്ക് ഇത് തിരിച്ചറിയാനാകും.
കുഞ്ഞുങ്ങളോട് വാല്‍സല്യം കാണിയ്ക്കാനായി ഇവരുടെ ചെവിയില്‍ ഉമ്മ വയ്ക്കുന്നത് ഒഴിവാക്കുക. ഇത് കുഞ്ഞിന്റെ കേള്‍വിയ്ക്ക് തകരാറുണ്ടാക്കാന്‍ സാധ്യതയുള്ള ഒന്നാണെന്ന് തിരിച്ചറിയുക. കുഞ്ഞിന്റെ കേള്‍വി ശക്തിയ്ക്ക് എന്തെങ്കിലും തകരാറുണ്ടായതായി തോന്നിയാല്‍ അത് വച്ചുകൊണ്ടിരിയ്ക്കാതെ എത്രയും പെട്ടെന്ന് തന്നെ ചികിത്സ തേടണം. ഇത്തരം പ്രശ്‌നങ്ങള്‍ പലതും പരിഹരിയ്ക്കാനുള്ള വഴികള്‍ ഇന്നത്തെ കാലത്ത് ശാസ്ത്രത്തിലുണ്ട്.
