കേരളം
കശുവണ്ടി വികസന കോര്പ്പറേഷന് അഴിമതി; പ്രതികള്ക്കെതിരെ പ്രോസിക്യൂഷന് അനുമതിയില്ലെന്ന് സര്ക്കാര്
കശുവണ്ടി വികസന കോര്പ്പറേഷന് അഴിമതി കേസിലെ പ്രതികള്ക്കെതിരെ പ്രോസിക്യൂഷന് അനുമതിയില്ലെന്ന് സര്ക്കാര് സിബിഐയെ അറിയിച്ചു. അഴിമതിക്കേസില് പ്രതികളായ മുന് എം ഡി രതീശന്, മുന് ചെയര്മാനും ഐഎന്ടിയുസി സംസ്ഥാന പ്രസിഡന്റുമായി ആര്. ചന്ദ്രശേഖരന് എന്നിവര്ക്കെതിരെയാണ് സിബിഐ പ്രോസിക്യൂഷന് അനുമതി ചോദിച്ചത്.
തെളിവുകളുടെ അഭാവത്തില് പ്രോസിക്യൂഷന് അനുമതിയില്ലെന്നാണ് വ്യവസായ വകുപ്പ് സിബിഐക്ക് നല്കിയ മറുപടി. 500 കോടിലേറെ അഴിമതി നടന്നുവെന്ന ഹര്ജിയില് ഹൈക്കോടതിയിലാണ് സിബിഐ അന്വേഷണത്തിന് ഉത്തരവിട്ടത്.
ഐഎന്ടിയുസി സംസ്ഥാന അധ്യക്ഷന് ആര് ചന്ദ്രശേഖരന്,മുന് എംഡി രതീശന്, കരാറുകാരന് ജയ്മോന്ജോസഫ് എന്നിവരാണ് കേസിലെ പ്രതികള്.
ഹൈക്കോടതി വിധിയെ തുടര്ന്ന് സിബിഐ അന്വേഷിച്ച കേസിലാണ് സര്ക്കാര് പ്രോസിക്യൂഷന് അനുമതി നിഷേധിച്ചത്. സിബിഐ റിപ്പോര്ട്ടില് വേണ്ടത്ര തെളിവില്ലെന്നാണ് നിയമോപദേശം.
കഴിഞ്ഞ നിയമസഭ തെരഞ്ഞെടുപ്പില് സിപിഎമ്മിന്റെ ഏറ്റവും വലിയ പ്രചരണ വിഷയമായിരുന്നു കശുവണ്ടി അഴിമതി. എന്നാല് അനുമതി നിഷേധിച്ചതിനെ കുറിച്ച് സിപിഎം എല്ഡിഎഫ് നേതാക്കള്ക്ക് ഒരു വ്യക്തതയുമില്ല.
തെളിവില്ലെന്ന് കണ്ടത്തലിന് അപ്പുറം ചന്ദ്രശേഖരന്റെയും രതീശന്റെയും ഉന്നത ബന്ധങ്ങളാണ് കേസ് എഴുതിതള്ളുന്നതിന് പിന്നിലെന്നാണ് പരാതി.
യുഡിഎഫ് സര്ക്കാരിന്റെ കാലത്ത് കോര്പ്പറേനിലെ അഴിമതി കണ്ടെത്തിയ ധനകാര്യ സെക്രട്ടറിക്കെതിരെ സെക്രട്ടറിയേറ്റിന് മുന്നില് ചന്ദ്രശേഖരന് നടത്തിയ സമരത്തിന് പിന്തുണ അറിയിച്ച് അന്നത്തെ പാര്ട്ടി സെക്രട്ടറി പിണറായി സമരപന്തലിലെത്തിയിരുന്നു.
ആരോപണ വിധേയനായ രതീശിനെ ഈ സര്ക്കാര് വന്നതിന് ശേഷം വ്യവസായവകുപ്പിന് കീഴിലെ സ്ഥാപനങ്ങളിലെ സുപ്രധാന തസ്തികളിലാണ് നിയമിച്ചതും വിവാദമായിരുന്നു. അപ്പോഴെല്ലാം സിബിഐ അന്വേഷണത്തെ കുറിച്ച് അറിയില്ലെന്നായിരുന്നു സര്ക്കാര് പറഞ്ഞിരുന്നത്. ഇതിന് പിന്നാലെയാണ് ഇവര്ക്കെതിരെ സിബിഐ കേസ് അവസാനിപ്പിക്കുന്നത്.