ഇരട്ടവോട്ടില്‍ കുടുങ്ങി ബിജെപിയും;പി കെ കൃഷ്ണദാസിനും ഇരട്ട വോട്ട് കണ്ടെത്തി

ഇരട്ടവോട്ടില്‍ കുടുങ്ങി ബിജെപിയും. എന്‍ഡിഎ സ്ഥാനാര്‍ഥി എം ടി രമേശിനു പിന്നാലെ ബിജെപി ദേശീയ നിര്‍വാഹക സമിതി അംഗവും കാട്ടാക്കടയിലെ സ്ഥാനാര്‍ഥിയുമായ പി കെ കൃഷ്ണദാസിനും ഇരട്ട വോട്ട് കണ്ടെത്തി.

കാട്ടാക്കടയിലും തലശേരിയിലുമാണ് വോട്ട്. കാട്ടാക്കടയില്‍ 64–ാം ബൂത്തില്‍ 793–മത് വോട്ടറാണ് പി കെ കൃഷ്ണദാസ്. വീട്ടുനമ്പര്‍ 700 എ, കൈരളി എന്നാണ് വിലാസം.

തലശേരി മണ്ഡലത്തില്‍ 79–ാം നമ്പര്‍ ബൂത്തില്‍ 322–മതായി ചേര്‍ത്തിട്ടുള്ള വോട്ടിന് 40/65, നന്ദനം എന്ന വീട്ടുപേരാണ് നല്‍കിയിട്ടുള്ളത്. രണ്ടിടത്തും രക്ഷകര്‍ത്താവിന്റെ സ്ഥാനത്ത് അമ്മ പത്മിനിയുടെ പേരുണ്ട്. 57 വയസും രേഖപ്പെടുത്തി.